صاحبي الشهيد .. عاطف يحيى ..

Tweet

قوليلي ياما واحكيلي

قوليلي عالسبب

احكيلي عالشهيد 

قوليلي إن السبب حرية

قوليلهم إن الشهيد ليكوا وليا 

احكيلي يا ام الشهيد عالحلم

قوليلي يا امي عالحرية 

احكيلهم ياما عالرصاصة والبندقية

شاوريلهم ياما علي اللي داس الزناد ولسة حاكم العباد 

قولي ياما لجل مايعرف العباد

متعيطيش .. اياكي تعيطي 

مات الولد ؟

آه مات الولد 

مات البطل ؟

آه ده آخر خبر 

مات الحر ؟

مات النهاردة 

مات الولد ؟

مات منتصر 

ياما وحياة قلبك اللي انكسر .. دمه مش هيروح هدر 

صرخة .. 

ده ولدي وعمري سندي يابلدي 

افرحي يا ام البطل ... ابنك راجل مش جبان 

زغرتي .... ابنك جدع 

افرحي ياأم الشهيد .. دم ابنك مش رخيص 

ماااااااات الولد 

مااات الجدع 

مات شهيد

يا بخت الولد

يا بختك يا ام الولد ... سمعاني ؟

ليه تكتب علينا يا قدر ؟

ليه بتبعده عن عيونا ؟

صرخة أم .. وبكا العديد 

دمعه على هلال وصليب 

أما القاتل يا بشر .. 

حر في بلادي ..فاكرينه منتصر ؟

سيبووووه يقتل المزيد .. بكرة نحصل الشهيد 

... وننتصر

عاطف يا ضحكة الدنيا وبكا عيوننا 

عاطف يا غيبوبة شهور .. وابتسامة وش لحظة موت !

أخيرا ارتاح من الألم .. مشي وسابلنا امل 

ارتاح ومكملين احنا العمل 

اشفعلنا عند ربك .. لجل مانحيي الوطن

افتكرنا مع الأنبيا .. وإوعاك تنسى الوطن 

افتكرنا في جنتك .. ونور فيها ضحكتك

يا ولدي صبرت ونلت .. ودلوقتي أنت حر 

أنت البطل .. حر 

أنت الشهيد .. حر 

امل .. والأمل حر 

لما تنزل قبرك .. حملنا دمك 

اتكتب علينا نشيل الدم 

من جنتك .. كلمنا عن الحرية 

اصبحت قلوبنا بالأسى .. معنية 

في موتك .. الحقيقة مقرية 

امي .. ام الشهيد 

أبية 

قوية 

غنية 

قولوا لكل العباد 

انشروا في كل البلاد 

إن دمه مش هيروح بلاش 

مهموم وهمي لجل احياء الوطن 

يا وطن قتلني بالسكات 

دلوقتي حان وقت الكلام 

حدثوني عن الآلام

ندد معايا بالرصاص 

ساند الامي بالصراخ 

آه يا بلادي آه يا وطن 

آه يا بلادي يا أم البلاد

مداري دمعي بالمنديل .. لجل ماتقوى أم الشهيد 

مداري وجهي الكئيب .. لجل عيون أم الشهيد 

ابكي في حضني ياما

مهموم قلبي ياما

مقتول حبيبنا ياما 

....

هبكيه كل يوم .. واحكي إنه عاش مظلوم 

قوليلهم قالك إيه ..

.. ياما أنا مش أقل من شهيد ودعته في يوم بالنحيب 

....

والآن 

أرقد يا شهيدي في سلام 

ولعزه ربك الإستسلام 

ليخف لسانك عند السؤال 

متنساش تشفع عند ربك للوطن 

سلامي ليك يا بطل ... 

إلى عاطف يحيى

شهيد مظاهرة السفارة 15 مايو 

استشهد اثر غيبوبة استمرت لأشهر عديدة 

نتيجه رصاصة من الجيش المصري العظيم 

.. ارقد في سلام

صبري خالد