Tuesday, June 7, 2011

عارفين كان إيه اللي ممكن يحصل ؟

امبارح كانت  الذكرى السنويه الأولى لاستشهاد خالد سعيد .. طبعا أنا مش بنكر ولاعمري هغفل حقه في إن استشهاده أو قتله بتلك الطريقة كان الشرارة اللي أشعلت النيران في قلوب  كثير من المصريين ومن هم أنا  ولكن نظرا لتوارد الاحداث في الاونه الاخيره فـأنا هستغل اسم خالد سعيد الذي كتب بحروف من نور في قلوب المصريين لنرى اوجه اخرى من عقول البشر   !!!
استنى شوية متستعجلنيش   ….
في صوت جاي من بعيد !! إيه بيقولوا إيه دول ؟؟
عدالة اجتماعية ده  بالضبط اللي قلته لما عدت أول مظاهرة في 25 يناير تحت بيتي وهتافهم كان مشجع وحماسي قوي والناس اللي ماشية في المظاهرة شباب ولاد ناس زي أو زي ما أنا بحب أقول ولاد ذوات اد إيه  كان عاجبني قوي إن لسة في ناس بتحس بالفقراء ونفسهم يعيشوا حياه كريمة زيهم  بالضبط من غير مكيون في مصلحة في الكلام ده  كان فعلا شعور حلو وكان ده اللي نزلني في أول يوم  .
والنهاردة بعد ماكل واحد عمل اللي شايفه صح من وجهة نظره امبارح في الذكرى السنوية الأولى لخالد سعيد …. هسأل سؤال بسيط قوي  إيه اللي كان هيحصل لو كان خالد سعيد مكان سواق الميكروباص اللي اضرب في قسم الأزبكية لحد ما مات ..؟؟
يعني أنا فاكر تاني يوم مقتل خالد الصبح لما شفت الخبر واتفرجت على الصور .. وبعد فاصل من الدموع أول حاجة جت في بالي اني أنا أو اخويا  ابن عمي أو صاحبي ممكن نكون مكان خالد ومن خلال متابعتي لشهادات الجيران والأصدقاء بتوع خالد كان في اجماع تم إنه شاب ابن ناس ومتربي ومتعلم يعني زيه زي اي شاب في سن 28 سنة.  
ومن كام يوم لما حصل اللي حصل مع سواق الميكروباص في قسم الأزبكية وما حدث من تزور غبي ومستفز للحقائق من الداخلية القذرة مش هنكر إني انبهرت برد فعل متظاهرين التحرير وتجمهر الناس امام القسم ومش هنخوض في اللي حصل امام القسم  .. أما مازاد انبهاري فعلا هي تصريحات مأمور القسم وقلت لنفسي يعني أنتم مش هتبطلوا كدب  !!      طب اتعلموا إزاي تكذبوا وتكونوا مقنعين  .... معلش ده أنا بسميه غباء ماركة داخلية .. ليكون لسا عندهم الفكرة المتخلفة اللي هي الشعب ده عبيط وبيعدي عليه اي حاجة .
وكان تعليقي الساخر اللي أطلقته امام الاصدقاء المتوترين امثالي إنه ايام خالد سعيد قالوا إنه بالع لفافة بانجو طب هيقولوا إيه على السواق ؟؟ بالع سلك دبرياش ولا رمان بلي مثلا.. لا اقصد الاستهانة بالفقيد ولكن كانت سخرية على تفكير الداخلية .
تباينت الآراء تجاه سائق الميكروباص بشكل يندي له الجبين .. مش من حزب الكنبة بس لأ .. ده من بعض الناس اللي مشيوا في نفس المظاهرة ايها اللي عدت من تحت البيت عندي .. لا شك إن كان في تعاطف كبير مع اللي حصل للسواق ولكن بعد شهادة البيه المأمور سمعت كلمة غريبة قوي ولم تكن كلمة واحدة لأ  كان كتير بس اكثرهم جذبا لأذني كانت
                                         أصله سواق ميكروباص ….. متوقع منه إيه يعني
وهنا كنت هجمت بموجة من الاسئلة المنطقية من وجهة نظري المتواضعة
هو مش السواق ده برده بني ادم زي وزيك  !!
هو مش السواق ده مشي في مظاهرات 25 برده زي وزيك !!
هو مش السواق ده وقف في لجان شعبية برده زي وزيك  !!
هو مش السواق ده ليه في الشارع بتاعه شهيد زي وزيك  !!
هو مش السواق ده اتنطط من الفرحة يوم التنحي... زي وزيك  !!
هو مش السواق ده مصري برده زي وزيك  !!
ولكن الإجابات كانت بتتراواح مابين السكوت والبعض كان يكرر نفس الكلمة بكامل الاستفزاز والاستهزاء .. وكان ردي عليهم بكلام معتقدش إنه جديد على مسامعهم   
ثورتنا كان أحلى مافيها إنها مش حكر على حد .. كانت ثورة شعب .. فاهم يعني إيه ثورة شعب  .. يعني أنا نزلت عشان لينا حقوق .. أنا قلت لينا مش ليَّ !! يعني ماكناش انانيين  .. وده كان أحلى مافينا ..
كل طائفة فيها الحلو وفيها الوحش وده مبدأ وحقيقة  ميختلفش عليها اتنين .. بس خلونا نفكر بهدوء.
 سواق الميكروباص مش ذنبه إنه اتولد في ظل نظام فاسد قذر وحقير وصل بدرجة حقارتة لأبعد مما وصل اليه الصهاينة .. على الاقل مش بيقتلوا أولادهم بأيدهم  وبدم بارد  ..يمكن يكون النظام السبب في إنه بقى سواق ميكروباص.
بالمناسبة هو نفس النظام القذر اللي خلى البعض يقولوا كلمة زي كلمة         أصله سواق ميكروباص متوقع منه إيه
هو نفس النظام الي زرع في الكثير منا التفكير بهذه الطريقة البرجوازية .. لو جينا نعد مساوئ حكم الثلاثين سنة اللي فاتوا هنلاقي إن مبارك مش بس سرق وعذب وقتل  !!! مبارك غيب عقولنا.... لانة سمح للبعض انهم يقول له كلمة زي دي
مبارك خلى بعض الناس تفتكر ان ليهم الحق انهم يفتكروا انهم اعلى من ناس تانيين لمجرد انهم اغنى أو اعلى مستوى تعليمي أو اجتماعي  !
يمكن يكون سوابق .. يمكن يكون مسجل خطر .. يمكن يكون قليل الادب .. يمكن يكون  أي حاجة .. بس ده بشر ليه أم مستنياه يرجع بيته .. ليه اب كان هو سنده في شيخوخته .. ليه صاحب هو سره .. ليه جيران وسطهم كانت حياته وذكرياته
اظن دي أسباب كفاية لاتعطي الحق في قتله أو تعذيبه حتى الموت .
الذنب مش ذنبه لو كان قليل الأدب عشان عشان ملقاش تعليم محترم في مناخ محترم تعليم في نظام يدعي إنه على مدار 30 سنة بيقدم التربية قبل التعليم .. التعليم ياخوانا مش علم بس مش حساب وعلوم وانجليزي  .. نفس النظام التعليمي الفاشل ده هو اللي افرز الناس اللي بتقول  "أصله سواق ميكروباص متوقع منه إيه
المفترض إن الثورة نورت وفتحت عقول خصوصا إن احنا عدينا  100 يوم على أحلى حاجة حصلت في تاريخ مصر عدينا 100 يوم على ثورتنا على الثورة اللي نادت بالعدالة والمساواه وقانون يحمي الجميع.
. وياه على الحزن اللي بيقتلني لما باسمع وبعرف إني في ناس لسة بتفكر بنفس الطريقة  ... لسة شايفين انهم اعلى من ناس لمجرد علم أو منصب أو مال لا يا حبيبي فووق بقى  !!!
كونك اكثر علما أو فضلك الكريم بمال عن غيرك ده لا يعطيك حقوق زيادة بالعكس ده بيزيد عليك الواجبات تجاه بلدك .. على الاقل تعرف الناس إيه اللي ليها وإيه اللي عليها  .. تساعد إنك تعلم جيل جديد عارف يعني إيه كلمة مصري  ولكن قبل كل ده  تعلم نفسك الأول عشان ماتقولش تاني كلمة   أصله سواق ميكروباص متوقع منه إيه
أنا حاولت اتخيل كان إيه اللي ممكن يحصل لو بدلنا حادثة خالد سعيد بحادثة سواق الميكروباص تفتكروا كان إيه اللي هيحصل .. الثورة هتتأجل مثلا  !!  يمكن يكون تساؤل مش في وقته ولا محله بس فعلا محتاج إجابة عليه .
…. بلدنا مش هتنضف الا لو نضفنا عقولنا
بحلم بمصر مصر الجديدة .. بحلم بعقول نضيفة .. بحلم بعدالة أكيدة.. بحلم بعدالة حقيقية.....
عاشت ثورتنا .

7 comments:

  1. This comment has been removed by the author.

    ReplyDelete
  2. brilliant :)
    لو بدلنا حادثه سواق الميكروباص بحادثه خالد سعيد كان كل الناس أجمعوا على أنه مجرد سواق وتطاول على ضابط فلما الظابط قاله عيب يابنى مش كده راح السواق طلعله الأر بى جيه اللى شايله فى التابلوه.. كان فى خوف و رعب من بعبع الداخليه على أيام العادلى(قبل الثوره) وكنا بنصدق -أو بنحاول نضحك على نفسنا- إن سواق الميكروباص اللى طالع عينه ممكن يفترى على ظابط شرطه

    ReplyDelete
  3. 1st. thank u :)
    إنتي فهمتي قصدي بالضبط .. ولذلك الشعب يريد تطهير العقول :)

    ReplyDelete
  4. كلام ممتاز
    يجب ان نسعى لإنتشار روح التواصل و التعاطف مع الأخر التى كانت هى قوة ثورتنا الحقيقية.
    كنا نعيش فى جزر منعزلة و نهمش من إنسانية الأخر الذى يقبع فى جزيرة أخرى. أن الأوان ان نلغى هذه الجزر الفكرية والطبقية و نعمل سوياً لبناء وطن يتسع للجميع.

    ReplyDelete
  5. يسلمك فمك يا شيخ انا خناقي مع الناس كلها حتي جوزي بسبب الموضوع ده انا اللي حمي بيتنا ايام البلطجة الشهيرة هوه واحد مسجل خطر من المنطقة والله العظيم رفض انه يشوف والدي سهران بالليل قدام البيت وهوه راجل كبير وقاله استحالة اطلع انت نام وعلي رقبتي لو حد جه جنب البيت وفعلا جاب ٣ اصحابه وقعد سهران كل يوم بالليل لمدة اسبوع يحرس بيتنا وفي الاخر الداخلية متسجل عندها انه مسجل خطر

    ReplyDelete
  6. great job my friend..as expected :)
    بس للاسف في ناس كتير كده و منهم نلس بتقول علي نفسها من الثوار

    ReplyDelete
  7. بعد التحية ..
    تم اضافة مدونتكم هذة الى ـ مدونون بلا قيود ـ
    وسوف ننشر مواجز وروابط لكل تدويناتكم خلال نصف ساعة من نشركم لها
    .
    http://facebook.com/modawenon
    http://twitter.com/modawenon
    http://modawenon.tumblr.com
    http://paper.li/modawenon/1307225574
    http://entaked.blogspot.com
    .
    ولكم فائق الحرية و الاحترام ,,,

    ReplyDelete