لن أنسى .. .. عاطف يحيى (الشهيد الحي) وضحكة الدنيا

Tweet

عاطف يحيى لمن لا يعرفه :

عاطف شاب عنده (22 سنة) خريج (معهد الحاسب الألى بالهرم)
عاطف يحيى شاب من الألاف الى شاركوا فى إحياء ذكرى النكبة أمام السفارة الإسرائيلية و تمت إصابته بالرصاص الحى من ( الأمن المركزى/الشرطة العسكرية ) يوم 15/5/2011
حكايته إيه؟؟؟؟؟
مع بداية الضرب عاطف إبتدى يجرى هو و أصحابه من ضرب الرصاص و الغاز إلى أصبح فى اليوم ده حق مشروع للأمن المركزى بحكم - الإشاعة الى روجوا ليها و صدقها كتير من الناس إن المتظاهرين دول بلطجية عايزين يودوا البلد فى داهية - و لقى و هو بيحاول يلاقى أى مكان ياخد فيه نفسه بعيد عن الضرب واحدة و بنتها خايفين و مرعوبين من الضرب الوحشى و من حملة الإعتقالات الى حصلت راح واقف بكل شهامة و حاول يهديهم .... بعديها الضرب إشتغل بكثافة فالكل جرى و عاطف معاهم و مرة واحدة إفتكر إن فى واحدة غلبانة مع بنتها ورا وقف لحظة و بص عليهم و كان عايز يرجع علشان يحميهم من الضرب و بالفعل لف و رجع تانى ____ صاحبه الى كان بيجرى جمبه دور عليه ملاقهوش إفتكر إنه كمل جرى و سبقه و مرة واحده سمع صوت واحد بيقول قتلوه بص وراه و لقى عاطف مرمى على الأرض ........... إتصاب عاطف بعيار نارى فى الرأس من الخلف تم نقل عاطف لمستشفى أم المصريين و الى كتبت تقرير إنه مصاب بطلق نارى و عملتله أشعة و رفضت إستلامه و تم نقله إلى مستشفى القصر العينى أول ما دخل المستشفى الدكتور عمل شوية فحوصات و شاف الأشعة الى عملتها مستشفى أم المصريين و قال لصحاب عاطف إن الرصاصة مستقرة فى مكان أمن داخل المخ و هيتعملوا عملية علشان يشيلوا الرصاصة و إذ فجأة بعد العملية يقول الدكتور إن مفيش رصاصة و إن الرصاصة إخترقت دماغه و مش موجودة و قالهم إن العملية كانت مجرد تنضيف للجمجمة و إتكتب فى التقرير الطبى الإصابة بطلق نارى و طبعا متحددش إن الى أصابه هو طلق العسكر سواء المدني ولا الميري ... 

التقرير الطبي المذكور فيه اصابة عاطف بطلق ناري 

عاطف نظرا لمعرفتي الشخصية بيه .. تحول بالنسبالي الصراع ضد العسكر من صراع على ثورة ومبادئ إلى صراع شخصي جدا .. اصبح متعلق بالثأر .. فلا أنساه في ليلة من الليالي عندما اخلد إلى النوم .. فهو اول ضحايا العسكر بالنسبة لي ومن كان لماسبيرو والإعلام القذر كالعادة نصيب الأسد في تشويه صورتهم ..

لمن لا يعرف .. 

عاطف من اسرة ميسورة الحال واخ لثلاث بنات ويتيم الأب .. أما الأم فلا حول لها ولا قوة .. اتذكر عندما كذبنا عليها في اول يوم اصابة .. وأخبرتها انه يعني فقط من ارتجاج في المخ نتيجة ضرب الأمن المركزي

سئمت الحديث عن المهزلة الطبية التي تعرض لها عاطف داخل جدران القصر العيني ..

ظل عاطف ينزف لمدة 48 ساعة منذ إصابته حتى دخل غرفة العمليات، ومن وقتها وحالته سيئة للغاية ويكاد يكون جثة هامدة، فاقدا للوعى فهو فى غيبوبة شبه دائمة، ولا يستجيب للصوت ولا يفتح عينيه ولا يقوم بأى حركات تلقائية .. في العملية الجراحية التي أجريت له تم استئصال فصين من المخ نتيجة اختراق الرصاصة من خلف أذنه اليمنى إلى اعلى حاجبه الأيمن .. ومضاعفات مابعد الجراحة .. متعدش يا مولانا !

حلم عاطف تحقق ليلة السبت، وكان يمكن أن يكون هو صاحب هذا الإنجاز الذى تحقق على يد أحمد الشحات الذى رد الاعتبار للمصريين بإنزاله العلم الإسرائيلى من فوق السفارة الذي امنا جميعا انه الرمزية بعينها .. مجرد الحلم والاستطاعة على تحقيقه ..

حالة عاطف تدهورت كثيرا في الايام الفائتة بدون اي التفات من اي شخص .. 

بعد ان قد يتحسن فقد دخل في غيبوبة ودرجة وعيه تكاد تقارب الصفر ..بمعنى اصح جثة هامدة 

فيديوهات :

                                      

                                     محمود سعد في برنامج (الميدان) وتقرير عن عاطف في اول ايام الإصابة

                                                  مين اللي ضرب عاطف ؟ فيديو بواسطه ( وليد ندا )

روابط مهمة في حالة عاطف يحيى :

مليش دعوة هما اللي خلوني أكلم - أول تدوينة ليَّ في ظل حكم العسكر عن عاطف يحيى 

«المصري اليوم» تحصل على تقرير طبي يفيد بإصابة شاب بالرصاص الحي في أحداث سفارة إسرائيل 

المصري اليوم :  نزع العلم «حلم» دفع «عاطف» ثمنه رصاصة فى الرأس.. وتحقق بعد 100 يوم

متنسوش عاطف يحيى : كان لقبه بين اصحابه " ضحكة الدنيا " أما دلوقتي " الشهيد الحي " 

ربنا كبير ..