كان فيه في ناس بتتريق على اللي بتهتف ضد مرسي عشان اللايف ستايل, احب افهمكم إن ده مش عيب ومن حقهم يخافوا عشان ده هيطولنا بأي حال, دي معركة حريات, في ناس بتحب الخمرة منهم أنا بصراحة خايف يمنعوها! ومعنديش مشكلة اهتف اعتقلوني اعتقلوني مش هتشيلو الويسكي من ايدي, مثلا يعني.
المشكلة إن الشعب ده مؤهل فعلا لأي كبت لانه اصلا مكبوت وللأسف الطبقات الدنيا بتحقد على حريات الطبقة الأعلى, ومحدش يقولي أنت خطابك نخبوي والكلام الكبير ده, من حقي أعمل اللي يريحني وأخاف على حياتي, يعني مثلا امبارح كنت بسلم على واحدة صاحبتي في الشارع وعادي جدا جدا جدا حضنتها, كان في راجل مراقبنا واحنا واقفين مع بعض وشايفه من بدري, أول مامشيت صوته خرم ودني وهو بيقول "إن شاء الله مرسي هيبطلكم البعبصة في الشوارع" - بصراحة ضحكني فشخ :D
في امثلة من دي كتير بيبقى كل اللي وراها حقد مش أكتر وكبت بقى نقص وعد يا معلم, ومتقولش شعب متدين واحترم قواعد المجتمع عشان محتمعنا ما شاء الله عليه سمعتة زي الألماظ في موضوع الإغتصاب والتحرش..
المهم يعني أنا هدعم حق اي حد إنه يعمل اي حاجة هو عايزها في حياته, وهفشخ اللي ممكن يفكر يمنعني إني اشرب اللي اشربه أو احضن اللي بحضنه, أو حتى أنام مع اللي بنام معاها, وأنتم مال دين ابوكم اصلا!
بجد مش فاهم ليه كل حاجة بنخاف نعملها في النور؟ ماهو طول مااحنا فينا ناس بتفكر إنه مينفعش نبوس بعض في الشارع عشان الناس وسخة, هيشجعهم ده!.. وبعدين أنا شايف إن لو عملنا زي الدنمارك مثلا الشعب هيتبسط.
No comments:
Post a Comment